Иерей: Господи Иисусе Христе Боже наш, благословивый пять хлебов и пять тысящ насытивый, Сам благослови и хлебы сия, пшеницу, вино и елей; и умножи сия во граде сем (или: в веси сей, или: во святей обителей сей) и во всем мире Твоем; и вкушающыя от них верныя освяти. Яко Ты если благословляяй и освящаяй всяческая, Христе Боже наш, и Тебе славу возсылаем, со Безначальным Твоим Отцем, и Всесвятым, и Благим, и Животворящим Твоим Духом, ныне и присно во веки веков.]
Хор: Аминь. Буди Имя Господне благословенно от ныне и до века. (Трижды)
Благословлю Господа (Пс.33)
Благословлю Господа на всякое время, выну хвала Его во устех моих. О Господе похвалится душа моя, да услышат кротцыи, и возвеселятся. Возвеличите Господа со мною, и вознесем Имя Его вкупе. Взысках Господа, и услыша мя, и от всех скорбей моих избави мя. Приступите к Нему, и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится ангел Господень окрест боящихся Его, и избавит их. Вкусите и видите, яко благ Господь: блажен муж, иже уповает Нань. Бойтеся Господа, вси святии Его, яко несть лишения боящимся Его. Богатии обнищаша и взалкаша: взыскающии же Господа не лишатся всякого блага.
Иерей: Благословение Господне на вас, Того благодатию и человеколюбием, всегда, ныне и присно и во веки веков.
Хор: Аминь.